نصيبي وقسمتي

سكريبت 
دخلت الصيدلية وأنا مبهدلة ومستعجلة واتكلمت بسرعة
دكتور ممكن تحل ليا السؤال ده انا اسفة بس عندي امتحان كمان ساعة ومستعجلة
كنت ماسكة الشيتات و لابسة البالطو والسؤال ده معرفتوش فدخلت اول صيدلية قابلتني الدكتور كان راجل كبير ابتسملي ملامحه مريحة وتجاعيد وشه زايداه جمال وابتسامته هادية بصلي بحنيه واتكلم

انا اسف يا بنتي بس انا بقالي زمن مدرستش الحاجات دي بس هندهلك ابني 
ابتسمتله واتكلمت وانا بنهج
اتفضل طبعا يا دكتور 
لاقيته بيشاورلي اقعد على الكرسي ودخل يشوف ابنه وخرج واتكلم بابتسامته الهادية
معلش يا بنتي هو ف الحمام هيخرج وييجي اسف لو هيعطلك بس انت مين وايه اللي عامل فيكي 
ابتسمت ورديت عليه اسمي هبة الله ف تانية صيدلة
انا مراد بس ما شاء الله اسم على مسمى لازم تبقي هبة من الله وانت صغيرة كده ولابسة الخمار يا بخت والدك بيكي 
اتبسطت اوي يمكن اول حد يجاملني بالخمار مش يتريق عليا خصوصا أن ملامحه شبه بابا الله يرحمه
ابتسمت ورديت
الله يرحمه يا دكتور على فكرة حضرتك شبهه اوي 
ابتسملي بحنية
انا هنا على طول يا بنتي هستناكي تيجي تقعدي معايا كل ما تحتاجيني يا هبة
دخل شاب طويل باصص ف الأرض بصيت ف الارض ع طول واتكلم
السلام عليكم 
والده ابتسمله
وعليكم السلام تعالي يا حبيبي حل للآنسة هبة السؤال ده عشان امتحانها
قالي الإجابة وشرحها وهو باصص ف الورقة بس الصوت حسيته مألوف شوية بس اكيد تشابه خلص شرح فاتكلمت وانا بقوم
احم تمام شكرا لحضرتك يا دكتور سلام عليكم 
روحت الامتحان وامتحنت كان امتحان زي الزفت ورجعت مش طايقة نفسي وكالعادة قولوني السقا لازم يشاركني احزاني امال
دخلت الصيدلية شوفته وابتسمت عشان فكرني ببابا تاني كان بيحاول يشب عشان يطول دوا من فوق بس مش طايل 
ابتسمت واتكلمت
عنك يا دكتور انا هجيبه 
ضحك بصوت عالي
اوعي تفتكريني عجزت لا ده انا اصبى منك 
ضحكت وانا بصاله وهو فرحان فرحة الانتصار لما عرف يجيب الدوا
ضحكت واتكلمت
لأ حيث كده بقى ده انا اشوفلك عروسة 
ضحك بصوت عالي
بس يا بكاشة
طيب انا كنت عاوزه شريط ليبراكس 
دخل ابنه وبص ف الأرض تاني راح دكتور مراد اتكلم
عندك القولون 
ايوه القولون العصبي 
ألف سلامة عليكي يا بنتي هاتلها يا ماهر ليبراكس 
كنت باصة ف الأرض ومحرجة جدا وهو كمان باصص ف الأرض واتكلم بجدية وهو مادد ايده بالدوا
خدي كولوفيرين مفعوله احسن
ف اللحظة دي اول مرة عيني تيجي ف عينه كالعادة اتوترت زي ما بتوتر كل مرة راجل يبصلي ف عيني وبصيت ف الأرض بسرعة 
تمام شكرا يا دكتور 
اخدت الدوا وشكرتهم وبقيت كل يوم بعدي على الصيدلية اقعد مع عمو مراد وحبني لدرجة انه خلاني اقف فيها ساعات عشان اتمرن فيها وكان بيقعد يذاكرلي كيميا لدرجة اني فعلا صدقت اني بنته بس مكنتش برفع حتى